(حرف الألف)
الف اولف ببّجديّ الحروفي
من الالف للياء باكمل وصوفي
من التجارب والحكم دون خوفي
الف . الف قلبي جميع العبادات

(حرف الباء)
الباء بغيتك يالخوي تستمع لي
وتوحد الله في العبادة تصلي
في وقتها واحذر بعضها تخلي
تعيش مستانس وتظفر بجنات

(حرف التاء)
التاء تقول الصدق في كل حاله
هذي صفات الكفو زادة كماله
الصدق منجاة الفتى في العضاله
الصادقين الله مدحهم بالايات

(حرف الثاء)
الثاء ثمن كل هرجٍ تقوله
احفظ لسانك لايزود ميوله
اللي تقوله لازم انك تطوله
الصمت حكمه واحفظ العقل بسكات

(حرف الجيم)
الجيم جارك وانتبه لا تخونه
حقه عظيمٍ واجب انك تصونه
غض البصر من حول بيته ودونه
من ناظر الجيران سوا الخيانات

(حرف الحاء)
الحاء حاول تفعل الخير للناس
هذا فقير وذاك بالحيل منحاس
اجر وجميله للفتى ترفع الراس
لو كان كلمه طيبة بابتسامات

(حرف الخاء)
الخاء خلك راجح العقل واعي
اثقل ولا تغتاظ من دون داعي
والفرق بين الخلق لازم تراعي
الله جعل بين الخلايق فروقات

(حرف الدال)
الدال دور للنسيب المناسب
ان كان تبغى في عيالك مكاسب
مهما يكون المهر بادر وحاسب
كم واحد استعجل وعود بحسرات

(حرف الذال)
الذال ذود بكل ما تستطيعه
عن عرضك و دارك حذاري تبيعه
يالله تكفينا شرور الفجيعه
وتظلنا بالستر في كل الاوقات

(حرف الراء)
الراء رجيت الله يسهل مرادك
ويزيل همن مرتكي في فؤادك
لا تشتكي وتقول همك غدابك
الله يفرج كل همن وضيقات

(حرف الزاي)
الزاي زليت ابمعاصي كثيرة
اطلب من الله المغفرة والستيرة
لو ان نفسك بالمعاصي كسيرة
الله يغفر كل ذنبن وزلات

(حرف السين)
السين سمح نيتك واذكر الله
الذكر رطب به لسانك و بله
في كل ساعة واحذر انك تمله
يرتاح قلبك لو يكن فيه جمرات

(حرف الشين)
الشين شارك بالفرح و التعازي
دنياك ما تمشي بخطن موازي
عن ولد عمك لا يجيك انحيازي
مره تزين وكم على الشين مرات

(حرف الصاد)
الصاد صد عن العلوم الدنية
ولا تصاحب من غدر في خويه
يرميك في بحر الضلاله بغيه
ويورطك في المهلكه والجنايات

(حرف الضاد)
الضاد ضيفك لا يرووح مكدر
ترى الكريم بكل ديرة مقدر
لولا الكرم ما كان رجلن تصدر
ثوب الكرم يخفي عيوبن ظهيرات

(حرف الطاء)
الطاء طوول في سجودك لربك
راحت فؤادك من همومك وطبك
وتعوذ من ابليس كانه لعبك
وساوس الشيطان ساس الغوايات

(حرف الظاء)
الظاء ظلم الناس اكبر مصيبه
خل الطمع كلن مقدر نصيبه
اللي ظلم لابد دعوة تصيبه
ما دون من يدعي ستار وحجوبات

(حرف العين)
العين عينك لا تناظر حرامي
العين مثل القوس يرمي السهامي
كم واحدن سارق بعينه حرامي
ترى البيوت اسرار للناس حرمات

(حرف الغين)
الغين غادر من حياتن كسيفة
لاتذل نفسك خل نفسك عفيفه
كلن على ما قيل راضي بكيفه
الحر ما يرضى يعيش المذلات

(حرف الفاء)
الفاء فك القيد لافكار عقلك
اللي نجح في دنيته شخص مثلك
فكر وشوف اللي غدى اليوم قبلك
ما عاقهم عن قمت المجد عوقات

(حرف القاف)
القاف قبرك عمره قبل موتك
طيب شرابك في حياتك وقوتك
لاغرغرت روحك وش يفيد صوتك
نور من الطاعه في القبر ظلمات

(حرف الكاف)
الكاف كمل نصف دينك بزوجه
مثنى ثلاث أرباع حسب المحوجه
قلبك يرفرف فوق عالي بروجه
خذها نصيحة واستمع للنصيحات

(حرف اللام)
الام لامنك نويت التجارة
الربح في مشراك حدد اطاره
ان كان ما تبغى تعود خساره
يالله لا تكتب لعبدك خسارات

(حرف الميم)
الميم مالك مال لله ترعاه
اخرج زكاته كانك الله تخشاه
وانفق لوجه الله لامت تلقاه
تربح بيوم العرض عند الحسابات

(حرف النون)
النون نيران الحسد لا تصيبك
يشب في صدرك ويسرع بشيبك
ياشينها شيناه تحسد قريبك
لاتستهين بشي لو كان نظرات

(حرف الهاء)
الهاء همزة وصل في وصل الاقراب
حاول تصل الارحام من قبل الاحباب
حتى ولو جافوك لا تحمل اعتاب
الوصل ماهو في مبادل زيارات

(حرف الواو)
الواو وسع خاطرك يا صديقي
دنياك ما تستاهل انك تضيقي
صاحب ولكنك بحسبة شقيقي
اصدق صديق اللي صدق بالصداقات

(حرف الياء)
والياء يوم اني لمثلك قصدي
كتبت الالفيه عساها تسدي
لو به حروفٍ باقية كان ودي
ابجد وهوز يائها بالنهايات

{بقلم/عبدالقادر الذوباني}