"وقفة بطل " قصيدة شعرية في مصاب بالحد الجنوبي
" وقفة بطل "
سلامي على النشمي وفوق التحية زود
مهابة وقوة تردع اللي يعادونك
سحاب المراجل ناض برقه ودوى رعود
تهلل به الخيرات من فيض مكنونك
على الحد لك وقفة بطل ترهب الازيود
تخلي بني حوث الخميني يهابونك
لجل كلمة التوحيد والبيت وال سعود
تجاهد و ترفع راسك و لا يهمونك
تعطر دمك عالحد بالمسك وايا العود
بعز و كرامة و فخر للي يعزونك
تصوبت مقبل دون مدبر ولا مردود
بصدرك وفي يمناك للي يشوفونك
تطمن ولا تحزن ترى فعلك المحمود
تسجل في التاريخ بصمة لمن دونك
انااقول لك لاباس باذن الله ان تعود
وتشفى وترجع ذخر للي يحبونك
تراني سندك ودرعك وسيفك المحدود
وانا يابواحمد ارخص الروح لعيونك
وقلبي معك لوكنت بالعاصمة مبعود
على نفس ما تهقى ولاخاب مظنونك.
الذوباني
